செவ்வாழைப்பழம் உண்பதால் கிடைக்கும் ஆரோக்கிய நன்மைகள்

செவ்வாழைப்பழம் அழகான மற்றும் பிரபலமான வாழைப்பழ வகைகளில் ஒன்று. இது நம்பமுடியாத ஊட்டச்சத்து மதிப்பைக் கொண்டுள்ளது. இந்த வாழைப்பழத்தின் பயன்கள் பல.

அசாதாரணமான சிவப்பு நிறம் நிச்சயமாக அவற்றிற்கு ஒரு சிறப்பு அழகை அளிக்கிறது. உலகம் முழுவதும் இந்த செவ்வாழைப்பழம் மெதுவாக ஒரு பிரபலமான தேர்வாகி வருகிறது.

இவற்றின் சுவை ராஸ்பெர்ரிகளைப் போன்றது. இந்த அழகான பழத்தின் தித்திக்கும் சுவை அவற்றை மீண்டும் மீண்டும் உண்ணத்தூண்டும்.

இந்தப் பதிவில் நாம் செவ்வாழை பழத்தின் ஆரோக்கிய நன்மைகள் மற்றும் ஊட்டச்சத்து விவரங்களைப் பற்றி காணலாம்.

ஊட்டச்சத்து உண்மைகள்

செவ்வாழைப்பழத்தில் பெரும்பாலான அளவு தண்ணீர் மட்டுமே நிரம்பியுள்ளது.  100 கிராம் செவ்வாழைப்பழத்தில் 74% தண்ணீர் உள்ளது. ஆனால், அவற்றில் வைட்டமின் சி மற்றும் துத்தநாகம் போன்ற ஏராளமான ஊட்டச்சத்துக்கள் நிரம்பியுள்ளன.

வைட்டமின் சி மற்றும் துத்தநாகம் இவை இரண்டும் உங்கள் நோயெதிர்ப்பு சக்தியை அதிகரிக்க உதவும். மேலும், இதில் குறிப்பிடத்தக்க அளவு புரதம், கால்சியம் மற்றும் மெக்னீசியம் உள்ளது.

தவிர, செவ்வாழைப்பழம் இதய ஆரோக்கியத்திற்கு ஏற்ற ஒரு பழமாகும். 100 கிராம் செவ்வாழைப் பழத்தில் 0.33 கிராம் கொழுப்பு மட்டுமே உள்ளது மற்றும் இதில் கொலஸ்ட்ரால் இல்லை.

செவ்வாழைப்பழத்தில் 100 கிராமுக்கு 22.84 கிராம் அளவுக்கு கார்போஹைட்ரெட் நிறைந்துள்ளது. எனவே கீட்டோ டயட்டில் (Keto Diet) இருப்பவர்களுக்கு இது உகந்ததல்ல.

செவ்வாழைப்பழத்தில் சர்க்கரை அதிகம் இருப்பதால், இது 100 கிராமுக்கு 89 கலோரிகளை வழங்குகிறது. இருப்பினும், செவ்வாழைப்பழங்களில் நார்ச்சத்து நிறைந்திருப்பதால் அது உடல் எடையை குறைக்க உதவலாம் .

USDA-யின் படி, செவ்வாழைப்பழங்கள் 100 கிராம்க்கு பின்வரும் ஊட்டச்சத்துக்களை வழங்குகின்றன (1).

• தண்ணீர்: 74.91 கிராம்
• கலோரிகள்: 89 கிலோகலோரி
• புரதம்: 1.09 கிராம்
• கொழுப்பு: 0.33 கிராம்
• கார்போஹைட்ரேட்: 22.84 கிராம்
• நார்ச்சத்து: 2.6 கிராம்
• சர்க்கரை: 12.23 கிராம்
• கால்சியம்: 5 மி.கி (தினசரி மதிப்பில் 0.05%)
• மெக்னீசியம்: 27 மி.கி (தினசரி மதிப்பில் 7%)
• பாஸ்பரஸ்: 22 மி.கி (தினசரி மதிப்பில் 3%)
• பொட்டாசியம்: 358 மிகி (தினசரி மதிப்பில் 10%)
• வைட்டமின் சி: 8.7 மிகி (தினசரி மதிப்பில் 10%)

செவ்வாழைப்பழம் நன்மைகள் (Benefits Of Red Banana):

1. ஆன்டிஆக்ஸிடன்ட்கள் நிறைந்தவை

செவ்வாழைப்பழம் ஆன்டிஆக்ஸிடன்ட்களின் ஒரு சிறந்த ஆதாரமாகும். மற்ற வாழைப்பழ வகைகளை விட செவ்வாழைப்பழத்தில் அதிக பினோலிக் சேர்மங்கள் உள்ளன.

எனவே இவற்றை உண்பது வயதாவதை தடுக்கிறது மற்றும் நீரிழிவு நோயை எதிர்த்துப் போராட உதவுகிறது (2).

செவ்வாழைப்பழத்தில் கரோட்டினாய்டு எனப்படும் ஆன்டிஆக்ஸிடன்ட் நிரம்பியுள்ளது. இது புற்றுநோய் செல்கள் உருவாவதையும் மற்றும் பல்வேறு கண் நோய்கள் ஏற்படும் அபாயத்தையும் குறைக்க உதவும் (3, 4).

தவிர, செவ்வாழைப்பழங்கள் குறைந்த சர்க்கரை உயர்த்தல் குறியீட்டு (Glycemic Index) மதிப்பைக் (44 ) கொண்டிருப்பதாக ஒரு ஆய்வில் கண்டறியப்பட்டுள்ளது. மேலும், அவற்றில் உள்ள பைட்டோ கெமிக்கல்கள் டைப்-2 நீரிழிவு நோயை நிர்வகிக்க உதவும் எனவும் கண்டறியப்பட்டுள்ளது (5).

இருப்பினும், செவ்வாழைப்பழம் உட்பட அனைத்து வாழைப்பழங்களிலும் கார்போஹைட்ரேட்டுகள் அதிகம் இருப்பதை நீங்கள் கவனத்தில் கொள்ள வேண்டும். எனவே, நீரிழிவு நோய் உள்ளவர்கள் அவற்றை மிதமான அளவில் எடுத்துக்கொள்வது நல்லது.

2. இரத்த அழுத்தத்தைக் குறைக்க உதவுகிறது

நம் உடலுக்கு பொட்டாசியம் இன்றியமையாத ஒரு கனிமம் ஆகும்.  பொட்டாசியம் குறைபாடு நம் இரத்த நாளங்களுக்கு மிகவும் தீங்கு விளைவிப்பதாக ஆய்வுகள் காட்டுகின்றன (6).

செவ்வாழைப்பழத்தின் முக்கிய பண்புகளில் ஒன்று அவற்றில் ஏராளமாக காணப்படும் பொட்டாசியம். இது இரத்த அழுத்தத்தைக் குறைப்பதற்கான சிறந்த தேர்வாக அமைகிறது.

மேலும், செவ்வாழைப்பழங்களில் மெக்னீசியம் ஏராளமாக இருப்பது தசை மற்றும் நரம்பு செயல்பாடு, இரத்த சர்க்கரை மற்றும் இரத்த அழுத்தத்தை சீராக்க உதவும் (7).

3. உங்கள் குடல் ஆரோக்கியத்தை பாதுகாக்கிறது

செவ்வாழைப்பழத்தின் மற்றொரு முக்கிய பண்பு அதில் ஏராளமாக உள்ள நார்ச்சத்து ஆகும். எனவே இது உங்கள் செரிமானத்தை மேம்படுத்துகிறது மற்றும் மலச்சிக்கலைத் தடுக்கிறது.

மேலும், அதிக நார்ச்சத்துள்ள உணவுகளை உட்கொள்வது இதய நோய்கள் மற்றும் மூலநோய் அபாயத்தை குறைக்க உதவும் என்று ஆராய்ச்சி கூறுகிறது (8 , 9).

இரத்தத்தில் உள்ள கொழுப்பின் அளவை பராமரிக்கவும் நார்ச்சத்து முக்கிய பங்கு வகிக்கிறது (10).

4. கருவுறுதலுக்கும் நல்லது

செவ்வாழைப்பழங்களை சாப்பிடுவதில் உள்ள மற்றொரு குறிப்பிடத்தக்க நன்மை என்னவென்றால் அவை கருவுறுதலை மேம்படுத்த உதவுகின்றன.

செவ்வாழைப்பழத்தில் பீட்டா கரோட்டின் மற்றும் வைட்டமின் சி ஆகியவை நிரம்பியுள்ளன. இந்த இரண்டு ஆன்டிஆக்ஸிடன்ட்களும் பெண்களின் கருவுறுதலுக்கு (Female Fertility) அவசியம்.

ஒரு ஆய்வின்படி, இந்த ஆன்டிஆக்ஸிடண்ட்கள் உண்பது பெண்களின் இனப்பெருக்க ஹார்மோன் செறிவுகளை அதிகரிப்பதாக தெரியவந்துள்ளது (11).

மேலும் செவ்வாழைப்பழங்களில் துத்தநாகம் நிறைந்துள்ளது. இது ஆண்மைப் பெருக்கத்திற்கு உதவுகிறது.

துத்தநாகம் விதைப்பை ஆரோக்கியத்தை மேம்படுத்துகிறது. ஆண்கள் இனப்பெருக்க ஹார்மோனான டெஸ்டோஸ்டிரோனை ஒழுங்குபடுத்துகிறது மற்றும் பொதுவாக ஆண்களின் பாலியல் ஆரோக்கியத்தை மிகவும் சிறப்பானதாக்குகிறது (12).

5. உங்கள் ஆற்றலை அதிகரிக்கும்

இவை உடனடியாக சக்தி அளிப்பதால், நீங்கள் கடினமாக உழைக்கும்போது செவ்வாழைப்பழங்கள் உங்கள் உடலுக்கு மிகச் சிறந்தவை.

கடின உழைப்பை மிகவும் திறமையாக பெற செவ்வாழைப்பழங்கள் உங்களுக்கு உதவும்.

வாழைப்பழங்கள் டென்னிஸ் வீரர்களுக்கு மிகவும் பிடித்த தேர்வாகும் எனபதை நாம் மறந்துவிட முடியாது.

6. மஞ்சள் வாழைப்பழங்களை விட சக்திவாய்ந்தது

செவ்வாழைப்பழங்கள் அதிக சத்தானவை என்பதை நாம் பார்த்தோம். ஆனால் அவை மஞ்சள் வாழைப்பழங்களை விட அதிக சக்திவாய்ந்தவை.

செவ்வாழைப்பழங்கள் மஞ்சள் வாழைப்பழங்களை விட மென்மையாகவும் இனிமையாகவும் இருக்கும். மஞ்சள் வாழைப்பழங்களை விட அதிக அளவு ஆன்டிஆக்ஸிடன்ட்கள், வைட்டமின் சி மற்றும் பீட்டா கரோட்டின் ஆகியவை செவ்வாழைப்பழத்தில் உள்ளன.

மேலும், நீங்கள் இனிப்புகளுக்கு அடிமையாக இருந்தால் செவ்வாழைப்பழம் ஒரு தனித்துவமான மாற்றாகும். இந்த பழத்தை நீங்கள் தவறாமல் சாப்பிட்டால் இனிப்புக்கான உங்கள் ஏக்கம் மிகவும் குறைவாக இருக்கும்.

ரொட்டி மற்றும் கேக்குகளை தயாரிக்கவும் நீங்கள் அவற்றைப் பயன்படுத்தலாம். செவ்வாழைப்பழங்கள் ஒவ்வொரு உணவிற்கும் மற்றொரு பரிமாணத்தைக் கொடுக்கும்.

முடிவு செய்தல்

செவ்வாழைப்பழம் அரியவகை வாழைப்பழங்களில் ஒன்று. ஒரு கவர்ச்சியான ராஸ்பெர்ரி போன்ற சுவை உங்களை அடிமையாக்கும். இந்த பழத்தை நீங்கள் இதற்கு முன் சாப்பிடவில்லை என்றால், முயற்சித்துப் பாருங்கள். இவற்றின் ஆரோக்கிய நன்மைகள் மற்றும் ஊட்டச்சத்துக்கள் உங்களை ஆரோக்கியமாக பராமரிக்க உதவும்.